I wott di gseh

I wott di gseh

Tuet eus Leid hei si gschribe
aber s’chönn nid jede blibe
euse Chef het müesse handle
wil die Chöschte immer stige
aber d’Hälfti vo de Stelle
heig er schliesslech chönne rette
dass du unersetzlech bisch
do druf hättsch du no chönne wette
Tuet eus Leid
Tuet eus Leid

Doch so schnell hesch resigniert
wil das alles nüt me bringt
Hundertmol Tuet eus Leid
wien e Hammer uf e Grind
Blibsch do hocke i dim Egge
und du losch di nüme blicke
Säg wie lang wotsch du so blibe
und di Wuet vor Wält verstecke

I wott di gseh
I wott di gseh
I wott di gseh, wie du kämpfsch
für es menschewürdigs Läbe
I wott di gseh, wie du kämpfsch
für es menschewürdigs Läbe
wott di gseh, wie du kämpfsch
wott di gseh

Du seisch du chönnisch nüt derfür
und es mach der sälber Sorge
es sig nid eifach zum Erkläre
dä Entscheid vo hüt am Morge
redsch vo rezessive Zykle
und Problem mit em Handel
vo de monetäre Zwäng
und em strukturelle Wandel
Es tuet dir Leid
Es tuet dir Leid

Suechsch noch immer schöni Wort
für di Brief und für d’Zitig
Für e Bitrag i de News
und fürs Interview vom Fritig
Doch dört unde i der Halle
losch di gschiider nümm lo blicke
Säg wie lang chasch du so blibe
und di vor der Wuet verstecke?

I wott di gseh
I wott di gseh
I wott di gseh, wie du rennsch
um dis nackte Läbe z’rette
I wott di gseh, wie du rennsch
um dis nackte Läbe z’rette
wott di gseh, wie du rennsch
wott di gseh